بسم الله الرحمن الرحيم

كيف تصبح مليونير في سنة

هقولكم تجربتي خلتني مليونيرة في 365 يوم
مش مليونيرة اوي يعني بس معايا فلوس 😂

انا اسمي سلمى الليثي 25 سنة , خريجة معهد حاسب الي , الحكاية ابتدت لما خلصت معهد حسيت بفراغ شديـــد و طول الوقت ما بين الموبيل و الكمبيوتر و التليفزيون ..

بدأ الملل ..

بدأت معاناتي مع الملل , و الاسئلة اللاوجودية تخطر علي بالي ( انا ايه لزمتي في الحياة , ايه الهدف اللي عايشه علشانه , انا بعمل ايه و عايشه ليه .. ) و أسأله من النوع دا , عملت الحاجه اللي كل الناس بتعملها لما بتسأل اي سؤال متعرفش إجابته .. أسأل جوجل ايوة هو جوجل اللي هيجيب م الاَخر , طب هسأل جوجل اقوله ايه ..

(  ازاي يروح الملل ؟! .. انا ايه لزمتي في الدنيا دي ؟! )

وبعد ما اقدرت استصاغ جملة مفيدة لسؤلي قررت اسأل جوجل

( ازاي افيد نفسي و يبقي ليا قيمة )

بعد معافرة مع جوجل لإجاد إجابة , لقيت إني لازم اطور من نفسي , و عشان الملل كان قاتل فعلا قررت اطور نفسي في كل حاجه

بدأت اتعلم كل اللغات انجليش و فيرنش و تركي و هندي و ايطالي ..

احسن موقعين لاقيتهم سهلين في تعلم اللغات بطريقة سهله

1- موقع بوسو  😂 ( busuu )

2- موقع دوولينجو  ( duolingo ) 

الملل زاد .. قررت اتعلم طرق جديده في الطبخ ( اشتغلت في هايبر كبير 3 شهور + اتفرجت علي قنوات طبخ و بدأت انفذ علي ارض الواقع )

بعدها اتعلمت ازاي اصنع حاجات منزلية (اشتركت في كذا قناة اجنبية بتنزل الطرق)

 ازاي ابقي فاهمه في التمريض  ( اشتغلت في مستوصف ) 4 شهور
اتعلمت ازاي اصنع ملابس ( اشتغلت في شركة ملابس تركية ) 5 شهور

طب وبعدين !

قولت ايه اكتر حاجه الواحد بيحتاجها غير زيادة محصلتة الفكرية !!

الفلوس

فكرت ازاي اجمع ملايين ويبقي معايا فلوس كتييييييييييير

1- جيبت حصالة كبيرة خشب بقفل و قطعت عهد علي نفسي اني عمري ما هفتحها غير بعد 365 يوم  ( بس نسيب موضوع الحصالة شويا )

2- نضفت بيتي : جمعت كل الحاجات اللي في البيت مش محتاجها ( هدوم و جزم مش بلبسها _ مفروشات قديمة مبستعملهاش _ أثاث قديم _ ادوات مطبخ _ ادوات مدرسية _ ورق _ حديد _ سلك نحاس _ ألومونيوم _ اكياس _ ازايز _ خيط _ اكسسورات _ كتب _ مجلات .. ) كل حاجه مبستعملهاش مكركبه البيت

أ _ فرزت الهدوم و اعدت تدويرها و غسلتها و كويتها و علقتها في الرشاقات

ب _ نضفت الجزم و لمعتها

ج _ غسلت المفروشات و خليتها جديدة

د _ فصلت بين باقي الحاجات ( الازايز البلاستيك و الازاز و الالومونيوم و النحاس و الخيط و الورق ... )

هـ _ بيعت كل حاجة بأسعار معقولة , و كده انا نضفت بيتي من الحاجات الزيادة اللي مكانش ليها لازمة

و استفدت بتمنها

3- المنزل : انا عايشه في بيت دورين دور ارضي فاضي و محل صغير و دور اول علوي اللي ساكنة فيه و دور تاني فاضي و سطح  , حبيت استغل المساحات دي

أ-  روقت الدور الارضي و عملت اوضه لدروس الاطفال اللي في ابتدائي بأسعار رمزية

و اوضه للاطفال اللي في سن حضانة

و شويا شويا ابتديت استضيف الاطفال اللي اصغر من سن الحضانه , لان في امهات بتشتغل بتبقي محتاجه تسيب ابنها في مكان لحد ما ترجع من الشغل

ب _ الاكل : عملت مقصف صغير للاطفال بقيت بشتري سناكس و شيبسيات و حلويات بالجملة و ابيعهم للأطفال

و في يوم عملت كيك جالي فكرة !!

( ليه مبيعش الكيك دا ؟ )

بدأت احسب تكلفة الكيكة و اقسمها و احسب سعر القطعة + المكسب , و ابتديت ابيعها للاطفال عملائي الاولون

و شويا شويا بقيت بعملهم سندوتشات و بعدها اكل و اتحول المقصف لـ كافيتريا

الامهات العاملات عجبتهم الفكرة و قالولي ايه رأيك لو تعمليلنا اكل جاهز بمقابل مادي عشان طبيعة شغلهم مبتخليش ليهم وقت يعملوا اكل طازه , عجبتني الفكرة و ابتديت انفذها

أ- اكل مجمد

( بدأت اعمل اكل مجمد زي ال بازلا و الملوخية و البطاطس و الفاصوليا ...  ) في اللي بيتخزن و اللي جاهز للطبخ

ب- اكل جاهز

( محشي _ صنية بطاطس _ كيكات .. )

و في مره كنت قاعدة بدي درس لاقيت بنت جيتلي من الشباك بتقولي ممكن اشتري كيس شيبسي ؟ قولتها طبعا ياحبيبتي

و من هنا بدأت ابيع من الشباك للاطفال و الشباب و البنات
و البضاعه بدأت اجيبها بزيادة و انوع فيها , و جيبت شامبوهات و كروت شحن و جيبنات و لانشونات

بعد غلو الاسعار فكرت ( ايه الحاجات اللي ممكن اوفرها و مجبهاش )

لاقيت اني لو فكرت مجبش الحاجات الغالية يبقي مش هجيب حاجه خالص , فكرت في حاجه تانية

تربية الطيور و الحيوانات :

استغليت الدور الثاني , نضفته كويس و قسمت الاوض

اوضة للأرانب : جيبت فيها ارنبتين انثي و ارنب ذكر و بطارية

اوضة للطيور : جبت 4 فرخات و ديك

اوضة للبط : جبت بطتين و دكر بط

استغليت السطح : عملت عشة حمام و جبت حمامتين انثي و حمامتين دكر

طبعا دا كله بعد ما عملت دراسة جدوي ليهم و نظمت وقتي
اهتميت بصحتهم و اكلهم و عملت نظام لكل حاجه

مش مكلف نهائي خصوصا ان اغلبيتهم بياكلوا بواقي الاكل اللي بيتبقي مننا فـ بدل ما يترمي الطيور تاكله ..

بعد فترة : الارانب حملت و ولدت

البط رقد و طلع بط صغير

الفراخ بدأت تبيض

بدأت ابيع بيض بلدي .. و الارانب و البط اكبرهم و ابيعهم و اسيب الانوع اللي هتفيديني منهم , و الحمام نفس الكلام



بعدها فكرت ارقد الفراخ علي البيض زي البط

طبعا بعد محاولات كتيييرة الفراخ مرضتش تقعد علي البيض 😂😂

ففكرت ارقد البط علي بيض الفراخ , اول مره البيض باظ
تاني مره حددت الاوقات و حطيت البيض في الوقت المناسب و البطة طلعت فراخ و بط , و بدأت الفراخ تزيد و البيض يزيد , و ربحهم طبعا يزيد

بردو كنت بلاقي وقت فراغ بليل , بقعد فيه علي النت و مش بستفاد بحاجة , لاقيت اني استغل قعادي علي النت بحاجه مفيدة

فكرت في الربح من علي النت وجمعت كل حاجه تخص طرق الربح من علي الانترنت

1- مواقع الاستطلاعات :

أ _ يوجوف :

هي شركة بتديلك 50 دولار مقابل الاجابة علي الاستطلاعات و عمل 5000 نقطة

5000 كتير اوي اني اعرف الموقع صادق ولا لا و اسحب منه فلوسي

و بعد ما حسبتها لقيت ان 5000 نقطة ممكن اجيبهم بطريقة تانية , لو دعيت 25 شخص و اشتركوا عن طريقي هيبقي معايا 5000 نقطة لان دعوة شخص واحد بـ 250 نقطة

بدأت بـ اهلي ( ماما و بابا و اخواتي ) بعدين قريبي و صحابي

و بعد معاناه جمعت الـ 5000 و عملت استرداد للمبلغ
يوم يومين تلاته 10 مفيش رسالة جيتلي بالحوالة , قولت دا الموضوع نصب بقي ,

دورت علي صفحتهم علي الفيس و بعتلهم رسالة ردوا عليا تاني يوم ان تفاصيل الحوالة وصلت البريد الالكتروني بتاعي , وفعلا فتحت بريد الياهو لاقيت تفاصيل الحواله و سحبت الـ 50 دولار من يوسترون يونيون

و بدأت اخلي ناس كتير تشترك عن طريقي و سحبت للمرة التانية و المرة التالتة قريب ان شاء الله ♥

 لو عايز طريقة بسيطة لشرح الاشتراك في يوجوف 👈 اضغط هنـا 👉

ب _ موقع بانل ستيشن :

موقع بردو بيدي فلوس مقابل الاجابة علي الاستطلاعات وفعلا طلع صادق و حولت 4 مرات فلوس منه لـ باي بال

و دي صورة حقيقية من الـ باي بال بتاعي بالفلوس اللي استلمتها

جـ _ موقع ريواردنغ بانل :

نفس موقع بانل ستيشن بتجمع نقاط و بتستبدلهم لقسيمة شراء من متاجر عالميه




د _ موقع موب روج :

موقع استطلاعات بالدولار اقل سحب منه 6 دولار


عايز تشترك فيه 👈  اضغط هنــا 👉 و اكتب بريد الياهو بتاعك في كومنت و هبعتلك لينك الاشتراك علي البريـد



بردو في وقت في يومي , لان الاستطلاعات دي مبتاخدش مني 5 دقايق في اليوم


2- التسويق : اوريفليم  _ فور ايفر _ ماي واي و ايفون و هكذا ..

بأختصار عبارة عن كاتلوج فيه منتجات بأسعار ماهووووله
لما بتبيعها بتاخد خصم علي كل منتج + نقط بتجمعها و بتاخد بيها جوايز

* الاستفادة الوحيده السريعة اللي ممكن تاخدها من غير تعب انك تعمل شجرة *

يعني ايه شجرة ؟
يعني تخلي ناس تشترك في الشركات دي عن طريقك بـ ( الكود بتاعك ) وهما يسوقوا المنتجات و يبيعوها و يجاهدوا و يجمعوا نقاط و انت قاعد سلطان زمانك بتاخد نسب من شغلهم

جيبت اوريفليم

و ماي واي

و خليت صحابي و قرايبي و اهالي الاطفال اللي بيجولي يختاروا المنتجات اللي عايزينها و اجمعها و اجيبهالهم كل اسبوع او اسبوعين

3- التسويق بعمولة : ملابس _ عقارات _ عربيات ...

هقولك مثال علي تسويق الملابس اون لاين علي حد علمي

واحد معاه سيوله

بيشتري ملابس جمله او بسعر المصنع

و ليكن الـ تي شيرت سعره 40 جنيه مثلا ( و دا بعد ما يكون المصنع كسبان فيه )

يبدأ البائع يقسم الناس فئات

الناس الـ مستواها المادي عالي الـ تي شيرت ليهم من 100 لـ 120
الناس الـ مستواها متوسط الـ تي شيرت ليهم من 60 لـ 80

و في الحالتين كسبان

المنتج كويس يبدأ يعمل زباين و يشوف ايه الملابس اللي علي الموضه و بتعجب الناس و محتاجينها و يفكر ازاي يسوقها في محافظات تانيه

يجيب منتج مطلوب جدا في السوق بسعر الجملة 50 جنيه
يجمع ناس كتير تحت مسمي وظيفي ( التسويق اون لاين )
يقولهم ان سعر المنتج 200 جنيه + عمولتهم + مصاريف الشحن = 250

بكده هو كسب 150 جنيه و هو مرتاح علي كل قطعه

خد المثال دا علي بيع الاحذية و العقارات و السيارات

مثال تاني علي ال سمسره العقارات :

واحد شقته تكلفتها الحقيقية 80 ألف جنيه ⇇ و عايز يشتري شقه تانية تكلفتها 150 ألف جنيه ⇇ فـ يعرض شقته للبيع مقابل 160 ألف جنيه

ميلاقيش مشتري ⇇ ينزل السعر لـ سرعة البيع يبقي 150 ألف ⇇ ميلاقيش مشتري
و هكذا لحد ما السعر يبقي 120 ألف و بردو مفيش مشتري ⇇

  يجي سمسار عقارات يقوله هبيعلك الشقه بعموله

السمسار يعرض الشقه بـ 160 تاني و يفضل ينزل في السعر ينزل في السعر ينزل في السعر , مره بغرض السفر و مره بغرض سرعة البيع

بحيث انه لو باعها بـ 130 كسب فيها و تحس انك كمشتري نزلت في سعرها

بس محدش بيشتري بردو

كده استنتجنا ان المكسب في التسويق اون لاين التسويق بعموله او تشغل حد تحتك⇊


4 - كتابة مقالات _ كتابة اخبار _ اعادة صياغة _ شغل ورد و اكسيل _ كتابة قصص _ مواضيع

الشغل دا سهل جدااا ومنتشر في كل مكان علي موقع خدمات و الفيس ( جروبات _ صفحات ) بس المشكلة انك لازم تختار شخص موثوق ومشهور تعمله الشغل دا

لان ساعات في ناس بتعمل صفحات مزوره و يخلوك تشتغل وتتعب و في الاخر الصفحة بتاعتهم تتقفل ومتعرفش تاخد فلوسك , وتعبك يروح علي الارض

بصراحه لسه موصلتش لشخص موثوق اقدر اقولكم عليه ..


5- اعلانات : عمل اعلانات بمقابل مادي

مش صعب تعمل صفحة وتكبرها واحدة واحدة .. الموضوع محتاج وقت و مثابرة

لما يبقي عندك صفحة فيها 10,000 متابع او اكتر متفاعلين

ممكن جدا تعمل عروض اعلانات للناس بمقابل مادي
تعلن لواحد عن شغله _ تكبر جروبات _  تعلن عن بيدج  _ تزود متابعين لـ صفحة شخصية او يوتيوب او تويتر .... ألخ

* هحاول اعمله ..

6- موقع خمسات :

دا موقع لبيع و شراء الخدمات المصغرة بمقابل مادي

ممكن عن طريقه  ( تنجز لناس شغل او تقدملهم خدمة بفلوس )
ترجمة _ كتابة مقالات _ انشاء موقع _ انشاء لعبة .... ألخ


وفي موقع بردو تاني زيه اسمه (  اي خدمة  )

7- جوجل ادسنس : طبعا اغلبية الناس بتسأل ازاي اكسب من اليوتيوب زي اليوتيوبر اللي مشهورين دول

أ   - تعمل بريد جيميل Gmail

ب - تعمل قناة علي اليوتيوب You Tube

ج   - تعمل بريد علي بللوجر Blogger و تعمل مدونة فيها موضوع يجذب الناس

د   - تشترك في جوجل أدسنس Google Adsense

تشترك في جوجل ادسنس و تربطه بقناتك علي اليوتيوب و بلوجر ...

تنزل محتويات علي قناتك مفيهاش حقوق نشر

يعني متنزلش اغنية مشهورة او فيديو لقناة معروفة عشان يا هيجيلك بلاغ و يتعملك حظر يا قناتك هتتقفل يا صحاب الفيديو هما اللي هيبقي من حقهم ربح الفلوس اللي هتجيلك من عدد مشاهدات الفيديو ( ومش هتستفاد حاجه )

فـ  لازم المحتوي يكون ملكك 100%

مش 100% اوي يعني 😃😃

لان في فيديوهات و موسيقي و اغاني علي النت من غير حقوق نشر ..

انا عملت كل دا .. عشان اتقبل في جوجل ادسنس طلبوا مني عمل مدونة تعدي الـ 100 مشاهدة .. وفعلا عملت مدونة ( طريقة الاشتراك في يوجوف ) و عدت الـ 800 مشاهدة و اتقبلت في جوجل ادسنس

و ربطت جوجل ادسنس بـ قناة اليوتيوب بتاعي

بس للأسف بعتولي رسالة بعد فترة ان عشان ابدأ الربح من قناة اليوتيوب و تتفعل علي ادسنس لازم يكون عدد المشتركين علي قناة اليوتيوب بتاعتي 1000 علي الاقل


بحاول علي اد ما اقدر انزل محتويات علي القناة تجذب الناس بس للأسف الموضوع بطيء جدا

في طرق كتير للربح من علي الانترنت :

زي مثلا ..

8- انشاء لعبة مربحة

9- انشاء تطبيق مربح علي جوجل بلاي Google Play

10- اختصار الروابط

طبعا من ضمن الربح من علي الانترنت كان اختصار الروابط

 ادفلاي  Adfly

موقع بتختصر فيه الروابط و اللي يضغط علي الرابط دا بيزود رصيده

كان الموقع اللي مشهور ساعتها و بشوفه كتير
بس لسه متأكدتش انه مربح فعلا و بيدي فلوس ولا لا

اضغط  👈 هنــا 👉  و شوف الاعلان و اعمل تخطي و ساعدني اتأكد فعلا الموقع دا صادق ولا لا



* كان بيجيلي رسايل من اورانج فيها روابط مختصرة لموقعين *( bit ly _ goo gl )

فـ قولت اكيد طالما شركة مشهورة زي اورانج مشتركة في الموقعين دول يعني مصدقيه الموقعين عاليه

جيت اشترك في اختصار جوجل goo gl

للأسف لاقيت ان جوجل اعلنت عن ايقاف خدمه اختصار جوجل

فـ اشتركت في بيتلاي bit ly عشان اتأكد من مصدقية الموقع

بس للأسف اكتشفت مؤخرا ان الموقع دا بيختصرلك الروابط و بيعرفك عدد الضغطات و الاماكن اللي تمت منها مش اكتر ( مجرد احصائيات يعني ) مش موقع ربحي




11- الموهبة : احلي و اجمل حاجة ممكن تربح منها و انت مبسوط موهبتك

أ _ الرسم : لو بترسم كويس ممكن تستغل موهبتك دي

 ترسم بورتريه

 تشكل كيكات

ب _ عمل مفروشات : موهبة جميلة جدا اغلبيتنا بنمتلكها

زي عمل مفارش للعرايس

تزين مخدات

ملابس من الكروشيه

شغل الكريستال ( مفارش - فوانيس - مداليات - فازات )

الحمدلله عندي موهبة الرسم بس محتاجه تطوير شويا

و المفروشات بحاول اتعلمها

الشغل بالكريستال هي الحاجة اللي شغاله فيها حاليا ( الفوانيس بعملها كل سنه قبل رمضان ) ( المفارش حسب الطلب للعرايس ) ( المداليات بردو ) ... ألخ

* و بالنسبه لموهبة الغناء و كتابة الاشعار و الاغاني  ممكن تستغلوها عن طريق نشرها في مدونات او عمل قناة علي اليوتيوب و عرضها *



و ان شاء الله قريب هنزل فيديوهات فيها كل الطرق اللي استخدمتها في المدونة دي بطريقة بسيطة علي 👈 قناتي 👉

ياريت تشتركوا فيها محتاجه دعم عشان استمر 😍😍

لو في اي استفسار ممكن تكتبولي كومنت

و بالنسبة لموضوع الحصالة لو عملت جدول لـ يومك انك تعمل كل اللي في المدونة دا هتلاقي ارباحك كويسه جداااا + اهم حاجه ( الفكه ) اي فلوس فكه تقع في ايدك  ( ربع جنيه , نص جنيه , جنيه ) متستهونش بيهم ولا تصرفهم في اي حاجه ملهاش لازمه و تقول اصل مش هيفيدوني بحاجه , حطهم في الحصاله و صدقني اخر السنه هتلاقيهم مبلغ كبير جداااا   #حقيقة_مجربة

متنساش تشارك المدونة عشان غيرك يستفاد

#سلمى_الليثي